«ОНАСИ КЎЧАДА ҚОЛГАНЛАР...»

Мактаб пайтлари устозимиз китоби йўқ синфдошларимиз билан китобларимизни баҳам кўришимизни, кўнгли кенг бўлишимизни сўрардилар. Қандай дамлар эди-я?! Яқин дўстлик деганлари ўша кезлар уйғонган бўлса, эҳтимол. Бугун эса китоб баҳам кўришга ҳожат йўқ...

rasm kerakligi sabab

Мақола мавзусининг бу дамларга сира алоқаси йўқ.

Бугун ёшлар орасидаги яқинликнинг жуда юқори чўққига етиб борганининг гувоҳи бўламиз, баъзи йигитчаларни кузатиб:

– Э онангни ...й, бир минут кутмадинг-а?! Кутсанг, ўлиб қолармидинг?!

– Онангни ...й, кут, девмидинг?! Ўзинг келмадинг-ку...

– Э анавида, онасини ...й, безрайиб ўтирибди ўзиям, қайт қиворгиларим келди башарасига. Бирам имиллади-ей...   

Суҳбат шу йўсинда давом этаркан, на бирининг иккинчисига нақ жағини узиб юборгудек мушт туширганини кўрдим, на мўлжаллаб туриб кўзидан ўт чақнатганининг гувоҳи бўлдим. На “Ошна, оғзингга қараб гапир” деганини эшитдим... Орияти ҳаётидан устун дея таъриф этилган эр-йигитлар авлодимиз, ахир, мушфиқ оналаримиз ҳам ўғил туғсин, ҳам унинг бурнидаги оқизиғини кеча артишга ўрганган ошналарига .... Тўғри, айтган билан шундай бўлиб қолармиди, пашшадан фил ясаётганга ўхшарман, балки?! Бироқ, бундай суҳбатлар давоми қулоғингизга чалина бошларкан, беихтиёр “оғзингни ёп, пашша кириб кетади” дейишгандаги сингари бор вужудингиздаги ўйдим-чуқур-у тешикчалардан ҳам, қулоғ-у кўзингиздан, ҳаттоки киндигингиздан ҳам хавотирга тушасиз-қўясиз?! Наҳотки, жадаллашув замони шу даражага етди. Астағфируллоҳ!!!

Шу йигитлар сингари фикр-у савияси юқори бир “мутафаккир” айтганмиш:

“Фақатгина менинг онам – фаришта. Чунки у мени туққан. Қолган аёлларнинг ҳаммаси – ...” Бу гапни бизда айтганда нақ ўттиз икки тишидан қонталаш милки қоларди, агарки, бўғзига ўтиб кетмаса жағ-пағи билан ... дердим. Афсуски, унақа эмас экан, қайтанга, уни шу йигитчалар ва уларга ўхшаб; чапак чалиб, олқишлайдиган, бир-биридан онасини “сўрайдиган”лар ўзига раҳнамо қилиб, бошига кўтарарди, аниқ ва ўша она “фаришта”га ҳам сўлаги оқарди.

Замондан ортда қолибман... “онаси кўчада қолган” дўстининг онасига эр бўлишга даъвогарлик қилаётганлар бугун “замонавий” эмиш. Улар гапирса бўлди, елкасига қоқиб қўйиб, ҳаттоки, қучоғлашиб ҳам кетаверишади. Қайси бет билан, қандай чидаяпти экан, қандай..?

rasm kerakligi sabab

“Онани қўшиб сўкмайдилар. Ким сўкса, ўзининг онасини сўккан бўлади...” дерди устозимиз. Онамни яхши кўрганим учунми, устозимизнинг гаплари қаттиқ таъсир қилгани сабабми сўкинмадим, сўкина олмадим. Бировнинг бундайин сўкинишини ҳам ҳазм қилолмадим. Сўкса, сўкаверсин...Онасини сўкаяпти, деб ҳам жим қололмадим...

Ўтиниб сўрайман... Сўкинманг, тилингизни, дилингизни покиза тутинг. Таъкид сингари онангизга, онангизга, онангизга меҳр кўрсатинг. Бундай тубан сўзларга йўл қолдирманг. Тил сизники, тил дўстингизники. Она... қани ўша тил билан уни тўла таъриф этинг-чи?! Қўлингиздан келармикан?! Тилагим онгингизга ақл-тушунча, кўнглингизга орият, ғурур ато этсин...

Сизни, онангизни, оилангизни ҳурмат қилмаган инсон қандайин дўст бўлади?! Ҳеч кимнинг онаси “кўчада қолган эмас”, Сизнинг ҳам... Ўйлаб кўринг!