МАҲЛИЁМИ МУБТАЛО?!

Статистик маълумотларга кўра, кўзгуга аёллардан кўра кўпроқ эркаклар қарашар экан. Алдаманг, деб оғзимга урманг. Рост сўзим, мен жаҳон кузатувчиларининг маълумотларига ишонибгина бундай демаяпман. Менинг ўз кузатувларим бор.

Маҳлиё бўлиш, ўз-ўзига термулиб қолиш деган касаллик юқумли эканми, вақт ўтган сари аёлларга яқин юрган эркакларда ҳам бу намоён бўла бошлади. Гапим ростлигининг исботи сифатида айтай, аёллар ўзгармас мейкап (грим, безаниш) га ўтиб олганига анча бўлган, ойнага қарашлари баъзан шарт ҳам бўлмай қолади. Эркаклар-чи?! Улар бундай енгилликдан фойдаланишга ўтишгани йўқ (Худонинг ўзи кечирсин. Шу гапимга ёлғон аралашди. Кўпчилик эркакларимиз бу йўлда аллақачон аёллардан ошиб улгуришган. Ўзбекистонда ҳам урфга кирмоқда).

Энди гапнинг индаллоси, сартарошхоналарда профессионал стилистлар хизмат кўрсатмоқда. Нархи хизмат сифатига боғлиқ. Соч-соқолингиз қиртишлаб бўлиб, ювиб-қуритиб, ялтиллатиб қўйса, янги услуб билан сочингизни у ёнидан бу ёнига қайириб, дазмол босиб, айиқнинг юнгидай хурпайтириб қўйса, сал қимматроққа тушади (баъзиларида белгиланган нарх ичида). Энди ҳар ойда (ўта замонавий, ҳусни таровати учун пул аямайдиганлар учун баъзан ҳар ҳафта, баъзан ҳар кун) ишингиз тушадиган сартарошлар ҳақида мақола ёзиш шартмикан, деган ўй Сизнинг стилист маҳоратидан бебаҳра қолмаган бошингизни банд этар. Мен ҳам уларнинг юмушлари ҳақида мақола ёзмоқчи эмасман. Лекин ойнага мубталолик, ўзга маҳлиёликнинг ҳаммаси шундан бошланади-да, фақат. 

Нега, нима учун шундан бошланар экан, дея савол бермасингиздан ўзим жавоб бера қолай. Қайтишингизда тавсиялар берган стилистнинг гап-сўзларига эътибор берсангиз, анча узоқ кўзгу қаршисида қолишингизга тўғри келади. Бир замонлар сочингизни бир тараш билан иш битган бўлса, эндиги аҳвол Сизга ноаён эмасдир. Достон («Тангалик болалар») дай қўлингизга бир туфлаб, сочингизни тўғирлай олмайсиз ҳозир. Ҳозир соч учун алоҳида (қизларникидан қолишмайдиган) турли бало-бадтарлар бор. Ялтиратувчи дейсизми, шакл берувчи дейсизми, силлиқловчи дейсизми ва яна … дейсизми. Ҳаммасидан бозорда бор.

                                      

Энди қош-қовоғингизни (буларни ўқиб) осилтирманг. Гўзаллик саҳифаси уларга ҳам Ғамхўрлик қилади. Вой-бўў! Қошларингиз бунча қалин, ўрмон-а ўрмон!!! Яна тарвақайлаб кетган дарахтдай хунук. Келинг, салгина уларга оро берамиз. Шамойилсиз қошларингизга шакл бахш этамиз. Сал ишлов берсак, тамом. Камон қошли хушсурат йигитга айланасиз-қоласиз. Лекин, кўзгуга қараб туринг. Қошингизнинг янги шакли эски ўрмон ҳолига қайтиб қолмасин, тағин (Мана, яна бир кўзгуга қараш билан боғлиқ тавсия).

Энди сўлғин юзларингизга ўтамиз. Бу юз билан қандай кўчада юрибсиз-а, ҳайронман. Агар аёлларда шу ҳолат бўлса, ўлдирсангиз ҳам кўчага чиқмайди. Сиз эса юрибсиз… Уялинг-е. Бу ҳуснбузарларингиздан қутулиш учун нима чора кўрдингиз, айтингчи?! Қаранг, юзингиз қуруқшаб қолибди. Совундан нотўғри фойдаланибсиз-да, акоси! Бу ҳам «ничего». Тўғирласа бўлади. Сал парваришласангиз, етарли. Кўзгуда натижаларни кузатиб бориш эсдан чиқмасин-а (энди билмадим, саноқдан адашиб кетдим, бу кўзгуга алоқадор нечанчидир тавсия эди)?!

Энди ўзингиздан мамнун бўлиб бошлаганингиз сари тишингиз кўриниб қолди. Қачон тилло тиш қўйдирдингиз?! Қанчага тушди?! Текин дейсизми?! Ҳа, сигарет ва носнинг фойдасимиди бу! Мана энди мен оғзингизга ураман. Ёпинг оғзингизни. Бу тишларни қандай кўрсатиш мумкин. Сиз севган қизга (баъзи уйланмаган йигитларнинг «хотини»га. Бежизга бундай демадим, чунки улар на шаърий, на қонуний эр-хотин. Улар учун булар эскилик сарқити) ачиниблар кетдим. Ёки у ҳам сиз каби бир гўрми?! Носни биргалашиб отишиб юрмайсизми, ишқилиб. Ундай бўлса, бу маслаҳатларимиз Сизга, ачинишларимиз у қизга ножоиз. Ойнага бир қаранг, секинроқ қаранг, яна юракни олдириб қўйманг. Анави рекламадаги тиш паста билан ювсангиз, айтишларича, оқартираркан. Кейин натижалар яна кўзгулардаги аксингизда намоён бўлади-да, азиз ўқувчи.

Шу десангиз, бегойимнинг беклари, бу натижаларни, кўзгуга маҳлиё бўлишнинг намуналарини суратларда муҳрлаб қўйинг. Келажакда эсга оласиз, шу мароқли дамларни. Қани сўнгги маркали телефонингизни олинг-у, селфида турли ёқимли-беёқим қилиқларни қилиб, лабингизни олдинга чўзиб, ўрдакча бўлинг ёхуд инглизча пишлоқ денг — суратга тушамиз. Қани-қани: «Cheese»!

Ана бўлмасам, вақт олий ҳакам. Вақтимиз ҳам ўз ниҳоясига етиб қолди. Хайрлашишдан, гапларимга нуқта қўйишдан олдин, эслатиб ўтайин. Кейинги маслаҳатларимизда, албатта, шотландлар юбкаси, репперлар кепкаси, калта шорти ва ичингиз кўриниб турадиган енгил фудболкалар ҳақида гаплашамиз. «Ўзингга қара» саҳифасида эса, эркаклар учун туш, лак, помада, атир, упа-элик, крем ва яна ҳатто Фармонбибининг кенжа келини Нигора («Келинлар қўзғолони») билмайдиган пардоз буюмлари ҳақида суҳбатимиз қизийди.

                             

Унутманг, гўзаллик дунёни қутқаради. Эрнинг гўзали уйнинг нотинчлиги. Хиёнатлар-у рашкларга чидаш қийин, бироқ, хунук эрга ҳам чидаб бўлмайди?! Айнан ҳис-туйғулар, қалб кечинмалари зоҳирингиз олдида қадрсиз бу замонда худди шундай. Нима бўлса ҳам, стилистдан омон қолган бошингизни ишлатинг-у, ўғлингизни кўчага бепардоз кўрсатманг?! Маслаҳатларимизга амал қилсангиз, хор бўлмайсиз. Сизлар билан сочи узун, лекин маслаҳатларига ўзи амал қилмайдиган

Хуршид бўлди.