MY TRUTH: АЁЛНИНГ ҚИРҚ ЖОНИ...

Аёлнинг қирқ жони бор, қирқ қиёфаси бор, қирқ туяга юк бўлар макри бор. Унинг қилдай нозик кўнглини тушуниш учун эса қирқ йиллик умр оз.

Бугунги жамиятимизда учрайдиган аёлларнинг йигирматаси эътиборимни тортади доимо. Шу топ йигирматаликдан ўрин олган аёлларнинг жамиятдаги ўрни мени қизиқтиради. Аммо билмайман, эҳтимол, Сиз биларсиз уларнинг ўрни хусусда...

20. Ўттизга кирмай ўтин бўлган деганларидек, мевали дарахт сингари мева тугмаган аёл (эри ёхуд ўзи айбдор). Кундан кун адо бўлиб бораётган, бахтини бола беланган бешикнинг ғичирларида кўрган аёл. Қирқ жонини шу саодат йўлида фидо этишга тайёр аёл. Эридан туйган меҳрида ҳам оғрик туйган, тақдир тандирида жони куйган, қарашлардаги маломатлардан тўйган аёл. Кундан кунга тўрт деворга ўзини кўмаётган, ўз кунига ўзи йиғлаб куяётган аёл...

19. Суймаганига турмушга чиққаними, камхарж ота-онасими, эр тўқмогига тўқнаш келаверганими, ноқобил эрнинг савдоларига қаршилик қилолмагани боисми ота уйга қайтган аёл. Болаликдаги хархашаларни-да кўтарган ҳовли энди унинг чин оғриқларини ўз саҳнига сиғдира олмайди. Оғриқлар отасининг кўзига, онасининг сўзига кўчади. Бетин такрор этилган чидам-бардош ҳақидаги маърузалар унинг нажот қалъасини барбод этаверади, вайронага айлантираверади.

18. Семизликни кўтарган қўй бу аёлнинг қаршисида арқонини ҳам эшолмай қолади. Бўйни бир қучоқ, ияклари остида элита парда қатимлари, тиллага кўмилган фиръавндай тақинчоқларин кўз-кўз қилаётган аёл. Агар шу тақинчоқлариним пулласангиз икки хоналик уй қуриб оласиз. Шунинг учун ҳам бир чизиқ керма қошлари пастламас экан-да!

17. Олий маълумотли, ҳуқуқини ҳам, ҳуқуқни ҳам билгувчи аёл. Давлат орденларига кўмилган сари қўл остидаги ходимлари қарғишларига чўмилаётган раҳбар аёл. Муассасасига ишга олинган ходим илк маошини раҳбарнинг хоҳишларига мусодара қилади. Уч ойлик ёзда ўз хоҳишига биноан ”мажбуран” таътилда ҳордиқ олади. Давлат ишидан ташқари эркак тех ходимлар раҳбар хонимнинг янги қураётган кошонасида ҳайрия ҳашарида фаоллик кўрсатишга сафарбар этилади. Ҳуқуқларни бузиб, ҳуқуқни муҳофаза қилгувчи аёл.

16. Ишлай деса, уйдагилар мажбурлаб эрга беришган, ўқимаган аёллар. Тикишни билади, аммо тикув машинкаси йўқ, ишлай деса ҳужжат, унга мос иш йўқ. Уйда ўтирай деса, эр ҳам уйда пашша қўримоқда. Улар одам, кичик бўлсада фарзандлари ҳам одам, бақа эмас тутилган пашшани ютгани. Ахир яшаш керак, бола боқиш керак. Кредит олай деса, қўйгали ҳеч вақоси йўқ, қани тепса тебранмас эрини гаровга қўйишни иложи бўлганда, кредит олармиди…Эҳҳ. Четга кетай деса пули ҳам йўқ, қўли калта. Жонидан ўтгач, қарз олиб жўнайди, аниқ. Дубайгами, Россиягами, Туркиягами, фарқсиз…

15. Зайнаб сингари кундошлик оғриғини дилга тугиб, 25-30 йиллик ёстиқдошини ёшгина жувон билан баҳам кўраётган аёл-у 2 ёки 3-хотин бўлган аёллар. Бойбуванинг малаклари. Мусулмонликда мумкин, дейсизми. Ҳа… Аммо, ўша уч аёлнинг иккитаси ноқонунийлигичи. Аёлни йўқлик, эркакни тўқлик бузаркан. Оиладан кўтарилган хотиржамлик кимга саодат олиб келади, ахир…

14. Ночорликми нигорлик йўлдан урган аёл. Тунми кунми ”хизмат” даги беминнат ”хизматчи”. ”Сотувчи” – нархни келишсангиз тамом. Қўлингизга ихтиёрини топширгучи тансотар аёл. Ёшми қари, чиройли ё хунук… буларни қадрини қўриқламай ибо қасрин дарвозасини вайрон қилган жувон. Унинг жамиятда ўрни нечоғлик…

13. Тўрт йилги олий таълимни тамом этиб, не-не умидларда дипломни қўлга олган аёл. Эрининг ”Топганим етмайдими!?” деган аҳмоқона саволига амр сингари бўйсунган уй бекаси. Бир томондан бу ҳолни қораламайман, бироқ шу аёл ўрнида таҳсил олганида бошқа бир абитуриент эҳтимол бугун ўша диплом билан ўз ўрнини топармиди?! Шунисига ачинаман. Олий маълумотли уй бекаси… унинг жамиятдаги ўрни қандай?

12. Изма кетин тўрт фарзандни дунёга келтирган, оилавий иммунитет тизимидаги етишмовчиликдан азият чекаётган аёл. Яримжон бўлиб қолган заифа. Кунда касал фарзандларига боқиб кенг дунёга сиғмаётган аёл тўрт қизи билан ўғил фарзанд тиланиб, уй эркагидан мурувват истаб келаётган аёлнинг-чи?!

11. Бу аёлнинг аёллик хислати қолмаган, гапларини эшитсангиз илондай тери ташлайсиз, дейишади. Бу кондуктор аёл автобусига ”кетмайман”, деган одамни ҳам босиб олиб кетиши мумкин. Агар йўлингиз унинг йўналишида бўлмаса, айбсиз, яхшигина сўкиниш ҳам эшитиб оласиз. Эркакни эркак сифатида кўрмаган, аёллик нафосатини автобуси ғилдираклари остига ташлаган аёл. Ади-бадиларга мезбон бўлган оғзи ҳар икки гапнинг бирида эркаклар айтишга шарм қиладиган гапларни жаврайди. Унинг ўрничи?!