МЕНИ СОҒИНДИНГИЗМИ?!

I AM ALONE

МЕНИ СОҒИНДИНГИЗМИ?!

Мен нега қайтдим, ушбу савол ҳануз менга тинчлик бермайди, эҳтимол, сизга ҳам. Мен бутунлай Сиздан сўраган эдимки, мендан кечишингиз, бутун ҳаётингиздан, ўй-у хаёлингиздан-да мосуво этиб, ўчириб юборишингизни. Нега сўраган эдим, чунки ўзим бунга қодир эмасдим. Жоним бўғзимга тиқилиб, ўзимни ўзимга бегона қилиб қўйган сўнгги воқеалар мажбур этганди мени.

  Айрилиб қолишни истамаган одамгина айбсиз ҳолида узр сўраши, бор айбни бўйнига олиши ҳам мумкин. Мен қўрқардим ва жуда афсусланардимки, сизсиз бу ҳаётим мазмундан айро, ўзим эса яна зулматга ғарқ бўлардим деб. Яна ўзимни ўйладимми ёки худбинона қарашларим қайтардимикан. Йўқ… мен аниқ биламан, буларнинг ҳеч бири менинг қайтишим учун асос бўлгани йўқ. Менинг қайтишим учун туртки бўлгани Соғинч!

                                             

Мен англаб-англамай соғиниб бошладим Сизни. Ўз-ўзим билан андармон лаҳзаларим бу бефаҳм онгимга ўрнашган тентакона хаёлларимга Қарқ бўлиб кетди. Мен кулган пайтимда нафратлар тимдалай бошлади ўзимни, мен йиғлаган пайт эса наҳотки дунёда ўзимга ачингувчи ўзим қолган бўлсам, деган ўй мени забт этди буткул. Билмадим. Билолмадим. Сизнинг қилаётган ҳар ишингиз хато-ю менинг истаётганим тўғридай мени емириб бошлади. Бунга ойдинлик киритишга ҳам кучим қолмади. Мен ҳақми, сиз ҳақ… Барчаси аҳамиятсиз экан. Мен фақатгина Сизни йўқотишни истамасдим, соғинч деган иблис мени яна бир бор ер билан бир этганда ҳам мен ёнингизда эканимни ҳис этишни истардим, холос.

Мен сизни ёмон кўраман, негаки, мени тўхтата олмайсиз, мен ўзимдан нафратланаманки, қола олмаслик важи менда устивор қолади кўпроқ. Ва яна ожизлигим сония сайин намоён бўлаётган шу кунларда кета олмаслигимни англай бошлайман, нима қилай, соғинч дегани барибир қайтараверса. Тўғри, мени ҳамон тўхтатиб, чеклаб туради бир алам-ранж, мен аввалгидайин ҳам бўлолмайман энди. Бироқ, нетайинки, мен ўзгардим, энди дўстликдан кўра кўпроқ сизга томон ошиқтиргувчи соғинч менда пайдо бўлиб бормоқда. У на буткул тарқаб кетади, на мени ютиб юборади. Ҳатто, ёнингизда Сизни соғиниб турибман, ҳатто, сиз билан суҳбатлашиб, суҳбатларингиз, кўзингизга қарашга журъат эта олмас онларимда ўша қарай олмаслик фурсатларини-да соғиниб юрибман. Ҳарқалай, Сизни Сиздай тасаввур этганман-да, ҳозирингиздан кўнглим хавотирда-ю, Сизни кечангиз боис соғиниб юрибман!

Юрагимда бир умид бор, ўлмайдиган, мени қувватлайдиган, ёмон кўришимни-ю нафратимнинг оловини музлатиб турадиган умидларим бор! Бари Аллоҳдан, келинг, ўтганига ўтди, дейлик, эртасига эртак деб баҳо берайликда, бугуннинг қадрига етайлик…

Мени соғиндингизми?!