ҲАММАСИ БИР КУНДА ТУГАЙДИ...МИ?!

Термиз давлат университетига кириш учун имтиҳон топшириладиган фанларнинг иккитасини, Тошкентдаги олий ўқув юртлари учун эса учта фанни ҳам ўқиш зарурдир. Лекин, ўқимаслик ҳам мумкинки, бунинг учун мукофотингиз бўлиши керак – Зулфияхоним қизларидек.

“Зулфияхоним издошлари” дея эътироф этиладиган қизларимизнинг тақдири қандай кечмоқда.

Сурхондарёлик бу мукофотга совриндор қизларнинг 10-15 фоизининг номи ўша мукофот олган йилдан кейин ҳам таъкид этиларкан, холос. Бир йиллик эътиборни тақдим этадиган мукофотми бу ёки университетга киргунча бўлган ҳаракатлар изчиллиги. Сурхондарёдан “пичоққа илинган” қизларнинг бор-йўғи еттитаси ҳақида маълумот топа олдим, холос. Лекин, уларнинг ҳам 90 фоизи ҳозир нима билан банд. Бу хусусда гап-сўз йўқ. 

                                           

Биргина 2011 йилги ғолиба Дилрабо Норқулова номи тез-тез такрорланиб тураркан. Тошкенти азимда воҳа шарафини муносиб ҳимоя этмоққа киришгандек туюлди. Бироқ, Гулниса Сайдалиева, Севара Норбоева, Вероника Володина каби қизлар ҳақида, уларнинг ҳозир, бугуни ҳақида гапириш мушкул. Ҳаттоки сўнгги йиллардаги воҳа зулфиячилари ҳам танаффус эълон қилгандек – Лутфия Баратова, Нилуфар Юсуповалар ҳақида эса фақатгина 2014 йилги матбуот саҳифалари сўзлайди. Бугунги ютуқлари хусусда эса жимжитлик ҳукмрон. Манзура Сайфиддинованинг ижоди қандай экан?! “Зулфия”ни қўлга киритгач, китоб чиқардими?! Менимча, у ҳам мақсадига етган ҳамтақдир қизлар сингари “таътил”га чиққан. Ишонаманки, бу кетишда 2016 йилда Манзура ҳақида ҳам бугун бонг ураётган ОАВ бир оғиз сўз демайди.

                                         

Мукофот янги зафарларга туртки, асос бўлиши керак. Эҳтимол, улар давомий музаффар одимлар билан келажак томон кетаётгандир. Фақат ОАВ оқсаётгандир, пайқамаётгандир. Шундай десак, унда интернет тармоғи (энг тезкори десак) Дилрабо Норқулова ҳақида унинг фаолияти хусусда тўхталган энг сўнгги гапни бор-йўғи бир ой аввал айтганди. Демак, ойда йилда бўлса-да кўриниш бермоқда. 5 йил муддат ўтаётган бўлса ҳам унинг изланишлари, фаолияти давом этмоқда. Бошқаларда-чи?!

                                     

Демак, Дилрабо масъулиятни ҳис этган, у “Зулфия”гача қилган ҳаракати билан тўхтаб қолмаган, бугун ҳам қотиб қолмай изланмоқда…

Барча “зулфиячи” қизлар номи тарих зарварақларига муҳрланган қатъиятли аёл Зулфияхоним сингари умрбод эл эътиборида бўлиш қисматини тилаб, уларнинг бунга муносиб бўлишларини истардим.

Йилига учталаб китоб чиқарган қиз бугун  уч йил бўлса-да, китоб нари турсин, матбуотда шеър  чоп этмайди. Танловларда жанжал қилиб, қучоқ-қучоқ тавсиянома, диплом, сертификат кўтарган қоғозбозлик билан шуғулланган, ота-онаси ҳам ҳар қадамида ҳамроҳ бўлган қизлар бугун жим. Негаки, пул мукофоти, осонгина, имтиҳонсиз олий ўқув юртига кириш имкнои ва ташвишлардан қутқазган Зулфияхоним номидаги Давлат мукофоти уларда бор… Заҳматли йўл эса шу еда тугаган. Изланишлар ҳам. Афсус!